१५ पुस २०७९,
काठमाडौं ।
नेपाल दूरसञ्चार प्राधिकरणले मोबाइल डिभाइस म्यानेजमेन्ट सिस्टम (एमडीएमएस) तत्काल लागू नगर्ने भएको छ । प्राधिकरणले आजदेखि यो प्रणाली लागू गर्ने तयारी गरेको थियो ।
सरकारको यो निर्णयको चौतर्फीरुपमा विरोध भएपछि तत्कालका लागि एमडीएमएस प्रणाली स्थगन गरिएको हो । सामाजिक सञ्जालमा चर्को आलोचना भएपछि प्रधानमन्त्री पुष्पकमल दाहाल ‘प्रचण्ड’ ले उपप्रधान एवम् अर्थमन्त्री विष्णु पौडेललाई तत्काल यो निर्णय कार्यान्वयन नगर्न निर्देशन दिएका हुन् ।
प्रधानमन्त्रीको निर्देशन लगत्तै प्राधिकरणले पनि यो निर्णय तत्कालका लागि स्थगन भएको र विदेशबाट आउनेले थप एउटा मोबाइल ल्याउन पाउने व्यवस्था कायमै रहेको जनाएको छ ।
