४ कात्तिक २०७९,
रोशी, काभ्रे ।
काभ्रे प्रतिनिधि सभा १ को प्रदेश सभा (ख) का उम्मेदवार एवं नेपाली कांग्रेस काभ्रेका सभापति तीर्थ लामाले काभ्रे विकासको स्पष्ट खाका नेपाली कांग्रेससँग भएको बताएका छन् ।
प्रतिनिधि सभा तथा प्रदेश सभा सदस्य निर्वाचनको घर दैलोका क्रममा शुक्रबार रोशी गाउँपालिका वडा नं. २ नारायणटार तथा वडा नं. १ ताङ्लिङमा भएका छुट्टाछुट्टै कार्यक्रमहरुलाई सम्बोधन गर्दै उनले मुलुक निर्माणका लागि कुरा नभइ काम गर्ने समय आएको र त्यसका लागि नेपाली कांग्रेसले नेतृत्व लिने युगीन क्षण आएको बताएका हुन् ।
समाज विकासका क्रममा हुने झिनामसिना विभेद भुल्दै एकले अर्कोलाई आक्षेप नगरी समाज विकासमा लाग्न जरुरी भएको बताउँदै नेता लामाले मुलुकलाई समृद्ध बनाउन विगतका तीता मिठा कुरा विर्सदै गठबन्धनका सबैजना लागि पर्ने धारणा राखे ।
केपी ओलीको अधिनायकवादका विरुद्ध गठबन्धन गर्दै उभिएको र यसको पनि नेतृत्व लिएका कारण गठबन्धनका सबै साथीहरु इमान्दार भएर लागि पर्नेमा उनको विश्वास छ । संविधानको पनि रक्षा गर्न भन्दै दुई–दुई पटक संसद विघटन हुँदा पनि मुलुकको सार्वभौमिकता जोगाउँदै चुनाव गराउने अभिभारा लिएको कांग्रेस सत्य, न्याय र निष्ठामा कहिल्यै नड्गमगाएको उनको जिकिर थियो ।
रोशी क्षेत्रको विकासका लागि आफूले अरबौंका योजना ल्याउने भन्दै उनले केही करोड भ्रष्टाचार गरौँला वा केही कमाउला भनेर आफू राजनीतिमा नआएको बताए । उनले भने, “म रोशीकै माटोमा जन्मिएको किसानको छोरा हुँ, रोशीको कुन भेगमा के विकास निर्माण आवश्यक छ मलाई राम्रोसँग थाहा छ । यस भेगका आवश्यकता मेरा प्राथमिकता हुन्, त्यसलाई पुरा गर्ने बाचा गर्दछु ।”
शिक्षा, स्वास्थ्य, रोजगारी, युवा पलायनका विषयमा बोल्दै उनले उद्यमशीलतामालाई पहिलो प्राथमिकता दिने पनि बताए । घर दैलोका क्रममा सबै घरमा पुग्न नकिएला तर विकास निर्माण हरेक घरले आभाष गर्ने गरी काम गर्ने बताउँदै उनले भने, “रोशीको हावा पानीमा हुर्कोको मेरो शरीरमा एक थोपा रगत रहुन्जेल रोशी क्षेत्र र समग्र काभ्रेको विकासमा दत्तचित्त भएर काम गर्नेछु ।” आफ्ना गतिविधिले कुनै पनि काभ्रेलीको शान मान र इमानमा आँच आउन नदिने लामाको भनाइ छ ।
केही व्यक्तिहरुले गठबन्धन इमान्दार हुन नसक्ने गलत प्रचार गरिरहेको, कांग्रेस भएर माओवादीलाई र माओवादी भएर कांग्रेसलाई भोट हाल्न सकिन्न भन्ने खालका गलत भ्रम फैलाइरहेको भन्दै नेता लामाले तर्क गरे, “सो सरासर गलत हो, प्रतिनिधि सभाको क्षेत्र नं. १ मा गोलाकार भित्रको हँसिया हथौडामा लालध्वजजीलाई र प्रदेश सभाको ‘ख’मा नेपाली काग्रेसको रुख चिन्हमा मतदान गर्न आग्रह गर्दछु ।” केन्द्रदेखि टोल बस्तीसम्म नेपाली कांग्रेस, नेकपा (माओवादी केन्द्र), नेकपा (एकिकृत केन्द्र) आफूहरु सँगसँगै भएको बताउँदै उनले भ्रमको खेती नगर्न आग्रह गरे ।
लोकतान्त्रिक बाम गठबन्धनका उम्मेदवारहरुलाई अमुल्य मत दिन उहाँको आग्रह गर्दै नेता लामाले आफुले कुनै खोक्रो आश्वासन दिन नजानेको भन्दै भने, चुनावमा मात्र होइन म सधै तपाईकै घर दैलोमा, दुःख र कष्टमा आइरहनु पर्ने भएकोले कुनै झुटको खेति नगर्ने प्रष्ट पारे ।
रोशी २ मा नेपाली कांग्रेस वडा सभापति प्रताप सिं लामा र वडा नं. १ मा विरबहादुर लामाको सभापतित्वमा भएको कार्यक्रममा नेपाली कांग्रेस प्रतिनिधि सभा १ का सभापति दिनेश लामा, नेपाली कांग्रेसका महासमिति सदस्य सार्कीमान बल, नेकपा माओवादी केन्द्रका प्रदेश कमिटी सदस्य दैवलाल घिसिङ, कांग्रेस नेता शंखबुद्ध लामा, नेकपा माओवादी केन्द्रका तर्फबाट काभ्रे क्षेत्र नं. १ ख की समानुपातिक उम्मेदवार सुन्तली थिङ, नेकपा एकिकृत समाजवादीकी समानुपातिक उम्मेदवार रामदेवी तामाङ, नेकपा माओवादी केन्द्रका केन्द्रीय सदस्य कृष्ण अधिकारी, नेपाली कांग्रेस प्रतिनिधि सभा १ प्रदेश सभा ख का सभापति चन्द्र लामा, नेपाली कांग्रेस बागमती प्रदेश सदस्य गुमानसिं लामा लगायतले लोकतान्त्रिक बाम गठबन्धनमा कुनै शंका नगर्न र ढुक्क भएर गठबन्धनलाई मत हाल्न आग्रह गरेका थिए ।