२२ असोज २०७९,
काठमाडौं ।
नेकपा एमालेका नेता बालकृष्ण ढुंगेलको निधन भएको छ ।
शनिबार बिहान काठमाडौंको काँडाघारीस्थित आफ्नै निवासमा ढुंगेल मृत भेटिएका हुन् । परिवारका अन्य सदस्य बर्दिबास गएकाले ढुंगेल घरमा एक्लै थिए । उनका परिवारका अनुसार घरकै बाथरुममा लडेर ढुंगेलको निधन भएको हो ।
यसअघि नेकपा माओवादीमा रहेका ओखलढुंगाका ढुंगेल पहिलो संविधानसभाका सदस्यसमेत थिए । २०६४ सालको संविधानसभा निर्वाचनमा ढुंगेल ओखलढुंगाबाट निर्वाचित भएका थिए ।
सशस्त्र द्वन्द्वका क्रममा भएको उज्जन श्रेष्ठको हत्या आरोपमा ज्यान मुद्दामा दोषी ठहर ढुंगेल करिब ७ वर्ष जेल बसेका थिए ।