११ बैशाख २०७९
काठमाडौं ।
काठमाडौंमा मेलम्ची खानेपानी आयोजनाको पानी वितरण आजदेखि फेरि सुरु भएको छ ।
खानेपानी तथा सरसफाइ मन्त्री उमाकान्त चौधरी बिहान नयाँ बानेश्वरबाट पानी वितरणको शुभारम्भ गरे । मुहान क्षेत्रमा गएको पहिरो र वाढीवाट क्षतिग्रस्त बनेको सुरुङको हेडबक्सको निर्माण पछि आयोजनाले पुनः पानी वितरणको तयारी थालेको हो ।
सुरुङ्ग मार्ग हुदै ल्याइएको पानी सुन्दरीजलमा रहेको प्रसोधन केन्द्रवाट वितरण गर्ने तयारी आयोजनाले गरेको छ ।
आयोजनाले बनाएको वितरण प्रणालीको पाइपलाइन परीक्षणको काम बाँकी रहेकोले आधाभन्दा बढी स्थानमा पुरानो पाइपमार्फत नै पानी वितरण गरिने भएको हो । बिच्छाइएको १ हजार १० किलोमिटर पाइपमध्ये आधा भन्दा कममा मात्रै अहिलेसम्म परीक्षण भएको छ ।
गएको चैत २९ गते मेलम्ची खानेपानी आयोजनाको मुहानमा रहेको सुरुङबाट पानी सुन्दरीजल आइपुगेको थियो ।
वर्षायाममा बाढीले पुर्याएको क्षतिपछि मर्मत गरेर आजदेखि फेरि मेलम्चीको पानी काठमाण्डौको धारामा वितरण सुरु गरिएको हो ।